BIOGRAFIA BADAK ESTANISLAU S. SALDANHA

ITA BELE KIAK MATERIA, MAIBE ITA LA BELE KIAK IHA FIAR, ESPERANSA HO ESFORSU

 

Estanislau de Sousa Saldanha (Alau) moris iha 29 Novembru 1964 iha Uatulari. Oan husi Januario Saldanha ho Amelia Sousa, agrikultor iha Uatulari nebee la hatene lee ho hakerek. Estanislau hanesan oan daneen husi maun-alin hamutuk sanulu resin (12), nebee nain rua fila ona ba aman maromak nian kadunan santo. Maun-alin sira nee mak Jacinta Saldanha, Salvador Januario Ximenes Soares, Adozinda Maria Nunes, Domingos Saldanha, Joao Mariano Saldanha, Saturnino Baptista de Sousa Saldanha, Angelina Joanina Saldanha, Ladislau Estaquio de Sousa Saldanha ho Cirilia Amelia de Sousa Saldanha.

 

Nudar agrikultor nian oan, Estanislau Saldanha nian tempu kiik barak mak pasa hanesan agrikuktor, halo toos, natar no hare karau iha Uatulari, ho dala ruma iha Uatucarbau. Maske nunee, Estanislau mos nunka husik eskola tanba Estanislau nian aman dehan: “eskola mak sai ponte ba moris diak ka eskola mak sei muda ema nian moris”. Tanba nee mak nian aman investa makas ba nian oan sira nian eskola.Nunee Estanislau nian maun ho bin sira hotu eskola iha Kolejiu Ossu ho EskolaTeknika ho Liceu Dili iha tempu Portugues. Karik la iha Revulasaun ihaPortugal, Estanislau nian maun alin sira barak mak ba ona eskola iha Portugal tanba barak mak hetan notas diak tebes (juara) iha sira nian estudu.

Estanislau hahu eskola iha Eskola Primaria Uatulari too 3 klase, atu tama kuarta klase, nia para eskola tanba krizi politika ho seguransa hahu iha tinan 1975 depois Revulusaun Aifunan iha Portugal. Estanislau hahu fali eskola iha 1980 iha Eskola Pre-Sekundariu Katolika (SMPK) Santo Paulo Dili, depois tuun husi Matebean iha tinan 1978.Tama iha Eskola Sekundariu Sao Jose (SMAK St. Yosep) Dili iha tinan 1983 no hotu iha tinan 1986. Tanba hetan kuadru de onra beibeik iha Eskola Sekundariu (SMAK St. Yosep) Dili, nunee posibiliza Estanislau tama iha Universidade Diponegoro (UNDIP) Semarang, Java, Indonesia iha Enjineria Kimika la liu husi ezame (PMDK) iha tinan 1986 no hotu iha tinan 1993. Estanislau Saldanha lulus bolsa estudu NZAID Nova Zelandia hodi tuir Kursu Ingles, Post-Graduate Diploma iha Teknologia Kimika no Programa Master iha Teknologia Kimika iha Outubru 1997. Iha Setembru 2014, Estanislau foin hahu tuir Programa doutoramentu iha Universidade Udayana Bali, Indonesia iha area “Marketing Management”.

Estanislau hahu servisu iha Inspektorat Wilayah Propinsi Timor-Timur iha tinan 1985. Maske nunee, tanba eskola, Estanislau foin hahu efetivu servisu iha instituisaun nee iha tinan 1993.Iha tinan 1994, Estanislau muda servisu ba Dinas Pertambangan Timor-Timur. Iha nee, Estanislau halo programa hodi haruka staf sira ba hola programa lisensiatura iha Indonesia tanba momentu neba Dinas Pertambangan la iha Enjineiru Minarai, Geologia ho Mineral. Programa nee hahu iha tinan 1997 no too Referendum 1999. Staf balu nebee mak momentu neba tuir programa nee mak Gualdino Silva, aktual Prezidenti Autoridade do Petroleo (ANP) Timor-Leste.

Iha tinan 1994, Estanislau hamutuk ho kolega sira seluk hanesan Costancio Pinto (Aktual Pro-Reitor UNTL nian ida), Agostinho Almeida (Aktual Adidu Edukasaun iha Indonesia) ho Jose Luis Lopes harii Fundasaun Sapiente iha Dili no nian mak sai Prezidenti Fundasaun nee. Fundasaun Sapiente harii hodi prepara joven sira ba eskola iha Universidade sira iha Indonesia. Partisipante programa nee balu mak Francisco Monteiro, Aktual Prezidenti Timor Gap ep no Doutor Espesialista Andre nebee servisu iha HNGV Dili. Programa nee finansia husi CIDA Canada liu husi ETADEP.  Fundasaun nee mos harii Pusat Studi Pembangunan Timor-Timur no prepara planu atu loke Institut Teknologi Baucau (ITB). Infelismente planu ida ikus nee la konsege realiza tanba ihatinan 1997, Estanislau ba eskola iha Nova Zelandia. Nunee Fundasaun Sapiente mos pratikamente la halao atividade.

Iha tinan 2001, Estanislau Saldanha ho familia fila husi Nova Zelandia. Nunee nian hahu tulun hodi prepara Sekretaria East Timor Study Group (ETSG),nebee agora sai Timor Institute for Development Studies (TIDS) iha Becora. ETSG nian servisu mak halo estudu, publikasaun, formasaun ho debate publika. Debate publika nebee popular mak konaba Draft Konstituisaun RDTL hodi kontribui hadia draft nee. Iha ETSG, Estanislau servisu too Fim 2002 no sai nudar Director, Center for Applied Science and Technology (CAST-ETSG).

 

Iha tinan 2002, Fundasaun Kristal iha planu atu harii Universidade Kristal. Nunee Fundasaun nee konvida Estanislau hodi sai Konseleiru hodi harii Universidade Kristal. Nunee Estanislau hamutuk ho membru Fundasaun Kristal hanesan Sr. Agostinho Goncalves dos Santos, Sr. Federeico (Prezidenti Fundasaun Kristal), Sr. Anselmo Conceicao (Aktual membru PN husi Bankada CNRT), Hipolito Aparicio ho belun sira seluk halo reuniaun dala barak hodi harii Universidade nee. Nunee mos Estanislau hamutuk membru Fundasaun Kristal ba kulia ho konvida Bispo Dioseza Dili, DomCarlos Filipe Ximenes Belo, SDB ho Sua Exelencia Kay Rala Xanana Gusmao, Prezidenti AVR hodi sai Membru Konselu Konsultivu ba Universidade Kristal.

Iha prosesu preparasaunharii Universidade Kristal, nudar Konseleiru, Estanislau rekomenda ba FundasaunKristal hodi loke Dili Institute of Technology (DIT) hodi troka fali UniversidadeKristal tanba momentu neba iha ona Universidade Nasional Timor Lorosa’e noInstitut Superior Ekonomia ho Gestaun (ISEG). Nunee Fundasaun Kristal la presiza halo duplikasaun. Diak liu, Fundasaun Kristal loke DIT nudar instituisaun ensinu superior nebee konsentra iha area enjineria, jestaun ho komersiu.Fundasaun Kristal aseita no muda universidade nebee atu harii nee ba DIT.  Kursu sira iha DIT hahu identifika ona, so kursu Politika Publiku ho Jestaun mak ikus mai rekomenda husi Dr. Joao Cancio Freitas.

Tuir mai Fundasaun Kristal nian hakarak Estanislau mak atu sai Reitor DIT, maibe nian lakohi. Nunee nian husu ba Fundasaun Kristal  atu nian mak buka Reitor DIT, no sira hakarak. Fofoun, Estanislau husu Sr. Helder da Costa, PhD,nebee momentu neba sei sai hanesan Diretor CNIC-UNTL. Maibe Dr. Helder lakohi tanba sei konsentra iha CNIC-UNTL. Nunee Estanislau kontaktu fali Joao Cancio Freitas, PhD nebee momentu neba sei eskola iha Victoria University of Technology (VUT), Australia. Kontenti tebes tanba Dr. Joao Cancio Freitas hakarak sai Reitor DIT.

Komisaun Preparasaun Harii DIT nebee Koordena husi Dr. Hipolito Aparicio (Matebean) halao enkontru dala barak hodi operasionaliza DIT, inklui prepara dokumentasaun hodi hatama ba Ministeriu Edukasaun. Preparasaun dokumentasaun hetan tulun mos husi Dr. Joao Cancio Freitas, bainhira nian aseita ona hodi sai Reitor DIT. Maibe tooiha  klaran mosu diferensa hanoin entre Dr. Joao Cancio, Estanislau ho Hipolito Aparicio iha parte ida no membru Fundasaun Kristal iha parte seluk. Diferensa nee konaba jestaun finansa DIT nebee tenki professional, independenti ho akuntavel hodi hatudu katak DIT nee nudar duni instituisaun komunitariu ho non lukrativu. Signifika membru fundador sira la bele hetan osan, sekarik la servisu iha DIT no la bele fahe malu “saham”. Nunee DIT hamahon an iha Fundasaun Kristal la bele avansa ba oin.

Estanislau ho Hipolito Aparicio lobi nafatin membru Fundasaun Kristal balu hanesan Agostinho Goncalves dos Santos, Anselmo Conceicao, Antonio Ximenes ho Jose Barreto hodi kontinua idea harii DIT. Nunee Tim nee, kontinua servisu hodi prepara harii DIT. Foufoun,Tim nee hanoin atu harii uluk Fundasaun ida hodi hamahon DIT. Nunee Estanislau, Anselmo ho Agostinho via Sr. Paulo Assis Belo husu AVR mos sai membru fundador DIT nian ida (laos sai membru Konselhu Konsultivu hanesan idea inisiu harii Universidade Kristal). Nunee mos konvida Sra. Kirsty S. Gusmao hodi sai fundador, maske antes nee hanoin uluk atu konvida Sua Exelencia Kay Rala Xanana Gusmao hodi sai membru Fundador ida. Tim preparasaun la konsege konvida Sua Exelensia Kay Rala Xanana Gusmao tanba momentu neba nian prepara an atu sai Prezidenti da Republika Demokratika Timor-Leste (RDTL).

Estanislau ho belun seluk kontinua servisu nafatin iha Dili atu prepara harii DIT nebee laos iha Fundasaun Kristal nian mahon. Mos husu Dr. Joao Cancio nebee iha Australia hodi prepara Estatuta Fundasaun F-DIT. Nunee iha 10 Maiu 2002, F-DIT harii ofisialmente nudar instituisaun ensinu superior iha momentu nebee Sua Exelencia Kay Rala Xanana Gusmao asina plaka. Asina plaka nee fasilita husi Sr. Paulo Assis Belo nebee momentu neba servisu iha AVR. Iha faze inisiu F-DIT, Estanislau sai hanesan Prezidenti F-DIT (mos sai nudar Vise Reitor Akademiku), Anselmo Conceicao sai Sekretariu F-DIT, Prezidenti BOT-DIT mak Sra. Kirsty S. Gusmao, no Reitor mak Joao Cancio Freitas, PhD, no membru Fundasaun seluk tama hanesan membru BOT-DIT. DIT hahu halo progresu lubuk ida iha Dr. Joao Cancio Freitas nudar Reitor DIT. F-DIT dessolve bainhira BOT-DIT aprova Estatuta DIT iha tinan 2012.

Iha Maiu 2006, DIT taka total no la iha atividade, staf hotu la servisu no barak mak ba servisu fali iha instituisaun sira seluk tanba impaktu husi krizi politika ho seguransa iha Timor-Leste. Nunee mos Dr. Joao Cancio Freitas nudar Reitor hakesi an ho servisu seluk, nunee la kontinua ona servisu iha DIT. Barak mak lakon ona esperansa ba DIT depois taka iha Maiu 2006. Maibe Estanislau ho belun seluk hanesan Isabel de Lima, Maria Jose Fonseca, Carla da Costa, Peres, Melny, Antonio da Costa, Agostinho Marcal, Basilio de Jesus ho tulun husi belun Voluntariu balu husi Australia hanesan Annie Keogh, Catharina Williams van Klinken, PhD ho Karen buka dalang oioin hodi re-estabelese DIT iha Dili. Nunee iha fulan  Agustu 2006, Estanislau ho belun sira nee harii edifisiu prepratoriu iha Fatin CAVR Balide hodi  prepara harii fali DIT. Iha Novembru 2006, staf DIT balu hahu tama tan, nunee atividade hanorin hahu fali ona iha Bairro Bite Dili. Iha tempu nee, Estanislau sai nudar Reitor Interinu.

Iha fulan Novembru 2007, BOT-DIT foti Estanislau sai hanesan Reitor definitivu ba periodu 2007-2011, no iha tinan 2011, Estanislau re-eleitu nudar reitor ba periodu 29 Nov 2011- 29 Nov 2015. Maibe iha tinan2014, Estanislau deside atu rezigna an hodi posibiliza ema foun, energia foun ho hanoin foun hodi lori DIT sai diak liu tan. Iha periodu nee nia laran,Estanislau nudar Reitor loke tan School rua mak School of Petroleum Studies ho School of Tourism and Hospitality hodi hakompleta School Engineering and Science ho School of Business and Management nebee iha ona.

Estanislau nudar Reitor honian belun sira iha DIT enfrenta problema mais kritiku ho defisil mak iha periodu 2006-2008 tanba DIT la iha osan, tusan boot (US$150,000), orsamentu rekorenti boot, no numeru estudante kiik tebes (148) nebee halo rendimentu DITkiik tebes hodi taka nian kustu. Maibe ho servisu tim nebee solid, no la sura kolen, Estanislau ho nian tim bele ultra-pasa dezafiu sira nee, no lori DIT hetan progresu too agora. Iha tinan 2008, DIT hetan akreditasaun ho valor boot (92.88%) no halo graduasaun dauluk ba estudante finalista iha tinan 2009, no tinan 2011, DIT selu hotu tusan iha Bank Mandiri Dili. Parese nee mos hanesan grasa wain ho milagre ida. Tanba nee, iha tinan 2012, DIT deside atu Nain Feto Grasa Wain nudar Mahein (Padroeira) DIT nian.

Nudar agrikultor no ema kiak nian oan no esperiensia rasik, Estanislau hanoin katak edukasaun mak sai fondase ba buat hotu. Edukasaun bele transforma ema nian moris. Tanba nee, iha DIT, Estanislau ho nian belun sira hanesan Ir. Anuciano Guterres, MSc (nudar Pro-Reitor) , Ir. Salustiano Piedade, MSc, PhD Cand. (nudar Pro-Reitor) ho Ir. Carla Alexandra da Costa (nudar Pro-Reitor)  iha DIT dezeina programa bolsa estudu ida ba ema kiak sira. Liu-liu ba agrikultor sira nebee la hatene lee ho hakerek nian oan sira husi distritu sanulu resin rua nebee eskola duni iha distritu hodi eskola iha DIT gratuita too hotu. Nunee DIT bele tulun ema kiak balu nian moris ba diak.

Estanislau hanoin katak DITtenki boot no tulun dezenvolvimentu nasional Timor-Leste via preparasaun kapitalumanu nebee kualidade no relevante ba Timor-Leste, peskiza ho servisu komunitariu. Nunee DIT tenki investa makas iha dezenvolvimentu kualidade dosenti ho fasilidade hanorin. Nunee Estanislau nudar Reitor taka matan hodiharuka staf sira hola programa master ho doutoramentu, maske desizaun nee dala barak halo nian toba la dukur tanba limitasaun rekursu orsamentu no presizafera ulun hodi hanoin implementasaun programa sira neee.

Estanislau mos hanoin katak DIT tenki harii ona Post-Graduasaun iha tinan 2014, nunee nudar Reitor, Estanislau husu Joao Cancio Freitas, PhD hodi koordena unidade nee iha tinan 2013. Dokumentasaun konaba Post-Graduasaun nee hatama ona ba Ministeriu Edukasaun, dosenti ho fasilidade hanorin ho aprende hahu prepara ona. Espera tinan 2015 Post-Graduasaun bele loke ona, no hahu uluk loke programa master iha Business and Management, depois tuir Engineria ho Turismu no ikus liu area Petroleu. Targetu antes tinan 2020, DIT loke ona programa doutoramentu hodi intensifika programa peskiza ho publikasaun hodi hamosu hanoin kreativu ho inovativu hodi dezenvolve DIT no Timor-Leste.

Estanislau nian vokasaun mak servisu iha edukasaun. Tanba nee, nia deside sai husi ETSG/TIDS iha tinan 2002 hodi dedika an ba edukasaun via DIT hodi tulun ema seluk hetan naroman, hatene hakore an husi kiak no bele defende an iha kualker situasaun no iha forsa hodi aktualiza nian an.  Nunee mos nian deside sai husi Koordenador Socio-Ekonomia, Estudu Pre-Viabilidade Dada Gas Natural husi Tasi Timor mai iha rai maran Timor nian nebee servisu hamutuk Sekretaria Estadu Rekursu Naturais (SERN) ho Kompanya Minarai PETRONAS Malaysia. Salariu iha instituisaun rua nee boot, bele dehan boot liu salariu membru governu iha tempu neba. Maibe Estanislau husik hela salariu boot nee hodi servisu no buka hasoru dezafiu iha DIT.

Ba Estanislau Saldanha osan laos buat hotu. Hanesan ema, Estanislau presiza duni osan, maibe osan laos halobuat hotu. Tuir Estanislau: “Ita nian riku laos osan mean ka osan barak, maibe ita nian riku mak ema”. Tanba nee, presiza hare ema didiak. Bainhira ita tulun ema seluk hetan naroman ho sai ema, ita mos sei hetan maluk barak ho ita sei la mate hamlaha”. Estanislau nian obsesaun boot mak oinsa dudu edukasaun DIT no Timor-Leste ba kualidade. Nunee edukasaun tenki halo Timor oan matenek no sai Timor oan duni hodi hamrik metin nudar Timor oan hodi kompete ho ema husi rai liur. Edukasaun Timor-Leste tenki hakore Timor oan nian hanoin ho hahalok kiak, no haforsa ho orguilu kaer nian identidade rasik hodi filtra valor kultural husi rai liur nebee tama makas iha Timor-Leste. Ho nunee mak bele prepara Timor oan tama iha kompetisaun global nudar Timor oan.  Atu alkansa objetivu boot nee, Timor-Leste tenki investa makas uluk iha edukasaun hodi dezenvolve kapital umanu, depois mak investa iha seitor seluk. Ema diak, kualidade, iha fiar, hahalok diak, no hamrik iha nian identidade rasik, sei halo Timor oan sai duni Timor oan ida nebee diak hodi kompete ho malae sira.

Nudar Reitor DIT, Estanislau hamutuk ho nian belun reitor sira husi Institute of Business (IOB), Instituto Professional de Canossa (IPDC), Instituto Superior Cristal (ISC), Instituto Para Formacao Dos Professores (IPFP) Baucau, East Timor Coffee Academy (ETICA) Ermera, Universidade Dili (UNDIL), ho ICR harii Klibu Instituisaun Ensinu Superior Privadu Timor-Leste (KIESP-TL) hodi tulun malu hadia kualidade edukasaun iha ensinu superior privadu sira iha Timor-Leste. Iha periodu dauluk, membru sira hili Estanislau sai hanesan Prezidenti Board too agora. Iha tinan 2014, Estanislau mos simu knar husi Ministeriu Edukasaun hodi sai Koordenador Grupu Enjineria hodi reve kurikulu Engjineria ba Universidade sira iha Timor-Leste. Iha tinan2012, Estanislau mos sai membru panel intervista ba bolsa estudu Fulbright  husi USA hodi sponsor Timor oan sira eskolaiha Amerika. Iha kualker tempu bainhira hasoru donor sira husi rai liur,Estanislau husu atu fo mos bolsa estudu ba Timor oan sira nebee eskola ihaTimor laran. Mos kria kondisaun atu Timor oan sira nebee eskola iha Timor laranbele kontinua eskola iha rai liur. Nunee bele evita hamosu grupu eksklusivu hoelite iha Timor-Leste nebee gradua husi Universidade sira rai liur.Importante  tebes hodi hatene katak estudante sira nebee eskola rai laran barak liu mak ema kiak ekonomikamente nian oan sira.Nunee bainhira dezeina bolsa estudu ba estudante sira estudu iha rai laran, neebele hamosu oportunidade ho asebilidade bolsa estudu ba ema kiak nian oan sira hodieskola iha rai liur no rai laran. Kontenti tebes tanba iha tinan 2014, DFAT(uluk ADS) Australia hahu konsidera hanoin sira hanesan nee, no loke mos bolsa estudu ba estudante sira iha Timor-Leste, no mos bolsa estudu balu ba eskola iha rai liur so oferese deit ba graduadu husi Universidade sira iha Timor-Leste.

Estanislau Saldanha kaben ho Isabel Franklin de Jesus Marques Belo (Betty) husi Boleha, Wailili, Baucau, iha Igreija Katolik Paulus “Miki”, Salatiga, Java, Indonesia iha tinan 1993. Agora Estanislau ho Betty iha oan nain tolu: Jovelinho Januario Baptista Franklin de Sousa Saldanha (Jovi), Estornino Alberto Franklin de Sousa Saldanha (Nino) ho Joaozinho Franklin Saldanha (Sino).

Iha 29 Novembru 2014, Estanislau halo tinan ba dala 50 (golden age). Tinan naruk ho badak nee la importante, maibe importante liu mak sa ida mak ita halo durante iha ita nian moris tomak. Ka obra sa mak ita halo durante moris? Tanba ita nian moris nee hanesan surat tahan mutin ida, nunee ita ida-idak buka hakerek buat ruma iha leten. Nunee ema seluk sei lee ho hanoin kona sai ida mak ita hakerek iha ita nian surat tahan leten nee. Obrigadu wain ba aman maromak, inan-aman, familia ho belun sira hotu nebee tulun ona Estanislau hodi hakarek netik buat ruma iha nian moris. maske la boot no la perfeitu. Estanislau mos husu deskulpa tanba asaun la perfeitu balu nebee halo familia ho belun sira balu moris la konfortavel, laran taridu no laran moras.  Hamulak ita hotu lao hamutuk, domin, paz no fraternidade. So ita lao hamutuk mak bele halo familia, sosiedade ho mundu nee sai diak, buras no hakmatek.*

Dili, 29 Novembru 2014

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: